Tenor statüts ed in rom dals mezs finanzials es la Pro Engiadina Bassa respunsabla per cha las seguaintas lezchas vegnan accumplidas:

• svilup economic regiunal
• plan directiv regiunal e svilup dal territori
• la realisaziun da la politica regiunala da la Confederaziun sco eir dal Chantun
• tour posiziun ed infuormar a la populaziun sur da dumondas d'interess regiunal
• manar la scoula da musica regiunala e la logopedia
• promoziun, sustegn, realisaziun e portader da progets, indriz ed ouvras  regiunalas, sül sectur da la sandà, da la chüra d'uffants, da colliaziuns da trafic sco eir dal trafic public, da la cultura, da la politica da giuventüna e scolaziun, sco eir dal sport. In quist reguard nu existan ingünas pretaisas güstiziablas invers l'associaziun.
• promoziun dal rumantsch vallader sco lingua uffiziala da l'associaziun
• organisaziun da l'allontanamaint da las immundizchas e realisaziun da las controllas da s-chodimaints.
• l'associaziun po sustgnair scoulas medias regiunalas. Las cumpetenzas finanzialas per sustegns sun regladas aint il reglamaint da finanzas. 
• l'associaziun po surtour la distribuziun supplementara da programs locals ed esters da radio e televisiun.
• accumplir lezchas chi vegnan surdattas tras contrats da collavuraziun intercumünalas. 
• administraziun d'associaziuns d'adöver chi surpassan l'intschess da l'associaziun o chi nu cumpiglian tuot ils cumüns da quella.
• funcziuns d'integraziun seguond il dret superiur.

L'associaziun regiunala po surtour las ulteriuras incumbenzas concretas cul acconsentimaint precedent explicit dals portaders da fin qua ed implü culla decisiun explicita da la radunanza regiunala, nomnadamaing: ils uffizis dal dret civil, da l'avuadia, dal cudesch fundiari, da scussiun e falimaint, i'l chomp administrativ in fats d'impostas, da pulizia da fabrica, fats socials, sül chomp da la fuormaziun e dal turissem sco eir dal forestal.